ಮನುವಚನ್ -ಚಿತ್ರಕ್ಕೆ ನನ್ನ ಕವನ

(ಚಿತ್ರ: ಮನುವಚನ್ ನ ಛಾಯಾಗ್ರಹಣ ಕೌಶಲ್ಯ)

ಇದರಿಂದ ಹುಟ್ಟಿದ ಹಸಿರುಳಿಸೆನುವ ಕಾಳಜಿಯ ಕವನ

ಎಲೆಮೇಲೆಳೆಹನಿ

ಎಲೆಯಮೇಲೆಳೆಹನಿ...

ಮಳೆಕರಗಿ ಹನಿಸಿತೇ?

ಇಲ್ಲಾ ಎಲೆಬೆವರಿತೇ..?

ಉಸಿರ್ಕಟ್ಟಿ ಪ್ರದೂಷಣೆಗೆ

ಬೇರ-ಬೇರ್ಕೊಂಡ ಬವಣೆಗೆ

ಕಾಂಡಕೆ ಬಿದ್ದ ಕೊಡಲಿಗೆ..??

ಇಲ್ಲಾ.. ಪಾರ್ಕನೂ ನುಂಗುವ

ಹಸಿರ್ಹಾಸುಗೆಗೂ ಲಗ್ಗೆ

ಎಗ್ಗು-ನೆಗ್ಗಿಲ್ಲದ ಭೂಕಬಳಿಕೆಗೆ..

ಭೂಗರ್ಭವನೂ ಬಗೆವವಗೆ

ಹೆದರಿ ಚಿಗುರೆಯಾಗಿ

ಚಿಗುರೊಡೆಯದಾಗುವ

ಮತ್ತೆಲೆ ಬಾರದೋ ಎನುವ

ಭಯಕೆ..ನಭಕೆ ತಲೆಯೆತ್ತಿ

ಬೇಡುತಾ ಅಳುತಿದೆಯೇ..??

ಕಣ್ಣ ಹನಿಸುವ ಹನಿಯ

ಕನಿಕರಿಸೆನುವ ದನಿಯೇ..??

ಹಸಿರಳಿದರೆ ಉಸಿರುಳಿಯದು

ಬೇಡ ಭಯ ಎಲೆ ಎಲೆಯೇ

ನೀನು, ಮನುಕುಲಕಿರುವ

ಅಳಿವುಳಿವಿನ ಏಕೈಕ ಸೆಲೆಯೇ.